Natutuliro, naguguluhan

Dahil di ko maintindihan ang aking nararamdaman

Hindi ka maalis sa aking isipan

Oo, ikaw

Katalinuhan at taglay mong lakas

Ngiti mong kay tamis at pilikmata mong nakataas

Kakulitan at kabaitan, mula sa iyo ay hindi makalas

Ito ay hindi ko pa nadama noon

Pag nakikita ka'y tila nadadala ng alon

Dahil sa saya, parang gusto kong tumalon

Oo, ikaw

Pero hindi ko alam paano sasabihin sa iyo

Mahirap na dahil biglang magbabago ang mundo

Inisip kong pagtingin sa iyo ay palipasin

Parang peklat, ito ay maglalaho rin

Iihipan ko na ito at tuluyang papaliparin

Ngunit ako ay nagkamali

Kailangan kong ipahayag ang damdaming di mawari

Isang gabi, ako ay gumawa ng sulat

Ang aking saloobin, naiisip at lahat

Wala na akong pakialam kung ito ay balewala sa iyo

Ang mahalaga'y napalaya ko na ang sarili ko

Mundo natin ay biglang natahimik

Dating magkakulita'y biglang walang imik

Napaisip akong hindi ko na dapat ginawa iyon

Pagkakaibigan natin dati ay nasaan na ngayon?

Tinatalikuran kita kapag ako'y iyong kinakausap

Tila hindi ko na yata kayang sa iyo ay humarap

Napapatingin na lang ako sa alapaap

At napapaisip na, "Hay, ito ang aking pangarap"

Nagusap tayo sa tapat ng eroplano

Tinatanong mo kung ano ang aking plano

Hindi ako makasagot

Puso at isip ko ay parang kinukurot

Umamin ka at sinabing ako ay gusto mo rin

Nagtataka ka kung bakit ikaw ay hindi ko pinapansin

Luha

Tila gustong tumulo mula sa aking mga mata

Buti na lang inihayag ko ang lahat gamit ang tinta

Nang gabi ring yun ay sinabi kong "Oo"

Oo, gusto kitang makasama

Oo, ikaw ang hinahanap ko sa tuwina

Oo, ikaw

Ikaw ang pangarap na akala ko'y di mapapasakin

Susuportahan kita ano man ang gusto mong gawin

Basta lagi mong tandaan na ikaw ay akin

Minsan, ako ay natutulala

Sa Diyos ay napakarami kong sala

Pero napakabuti niya at binigyan ako ng himala

Marami pang taon ang naghihintay

Saya, tamis, lungkot at pait ay parte ng buhay

Kakayanin ang lahat basta ikaw ang karamay

Oo, ikaw